वैभववाडी तालुका हा महाराष्ट्र राज्यातील सिंधुदुर्ग जिल्ह्यातील प्रवेशद्वार म्हणून ओळखला जाणारा तालुका आहे. कोकण व पश्चिम महाराष्ट्र यांना जोडणारा तालुका म्हणजे वैभववाडी. महाराष्ट्र राष्ट्रीय महामार्ग क्र. 115 ने कोकण व पश्चिम महाराष्ट्र जोडले गेलेले आहे. कोकणातील सौंदर्य, सह्याद्रीचा कणखरपणा यांचा मिलाफ म्हणजे वैभववाडी.

वैभववाडी तालुका हा ग्रामीण तालुका म्हणून ओळख असलेला तसेच पारंपारिक शेती व शेती पुरक व्यवसाय हेच येथील लोकांचे मुख्य उत्पन्नाचे स्त्रोत आहेत. औद्योगिकीकरणाचा या तालुक्याला स्पर्श नसल्याने निसर्गाचे निखळ सौंदर्य अजूनवर जपलेले आहे. वैभववाडी तालुक्याला धबधब्याचा तालुका अशी वेगळी ओळख असून नापणे, करुळ, शिराळे, आचिरण येथील धबधबे प्रसिध्द आहेत. वैभववाडी तालुक्यामध्ये कुर्ली, नाधवडे, आखवणे अशी तीन विशाल धरणे आहेत. ऐनारी येथील प्राचीन गुहा, नाधवडे येथील उमाळा ही ठिकाणे पर्यटन स्थळे म्हणून प्रसिध्द आहेत.